احدث المواضيع

الثلاثاء، 22 أغسطس 2017

حقيقة موقع kabmoney.club

حقيقة موقع kabmoney.club



موقع kabmoney.club من احد المواقع اللي طالعة جديد وبيوهمك انك ح تكسب وانت قاعد في بيتك من النت مبالغ تصل ل 100 او 500 دولار في اليوم.

تعريف موقع kabmoney.club

الموقع عبارة عن انك بتدخل تشوف اعلانات وبيظهرك عدد مكون من اربع ارقام وبيطلب منك تدخل الرقم ده صحيح في مربع في الصفحة بتاعة مشاهدة الاعلانات وكل مرة تدخل الرقم صحيح بيتحسبلك مشاهدة وبتكسب فيها 0.1 دولار (10 سنت) وبحسبة بسيطة كده انت ممكن تكسبلك 100 دولار في ساعة بدون اي مجهود.

طبعا الموقع اتشهر بقالو فترة من اسبوع كده في مصر وبدءت اللينكات بتاعتو تنتشر وبيطلبوا الناس اللي دخلو عليه انك تعمل حساب عليه خاصة ان الموقع بيدي 50% من ارباح اي حد ح يدخل باسمك لصاحب الدعوة يعني لو اللي دخل باسمك بياخد علي الاعلان 0.1 دولار انت ح تاخد كمان 0.05 دولار وهكذا.

يعني ح تعمل مبلغ خرافي.

كلام جميل وممتاز جدا يعني وتدخل تلاقي الموقوع سريع وحلو جدا وبيديك اعلانات طول اليوم لو حتي ح تشتغل عليه 10 ساعات.

الموقع اقل سحب فيه 150 دولار يعني متقدرش تسحب فلوسك قبل متوصل لمبلغ 150 دولار وطبعا عشان الموقع يضمن انك عملت مشاهدات كتير ب ال 150 دولار يعني 1500 مشاهدة وكتابة ارقام.

ازاي تسحب فلوسك من kabmoney.club

جميل دلوقتي انت عملت ال 150 دولار و حبيت تسحبهم الموقع بيقلك يلا بينا ممكن تسحبهم علي حساب بنكي او بتكوين او حتي باي بال بتدخل تكتب انت عاوز تسحبهم علي ايه وتيجي المفاجئة هنا ان الموقع بيطلب منك انك لازم تدخل 40 واحد باسمك عشان يستخدموا الموقع ده يعني لازم تعمل دعوة ل 40 واحد وطبعا انت مش ح تسيب ال 150 دولار فتروح رايح علي الفيس بوك وتوتير وقاعد تنشر لينك الدعوة الخاص بيك والموقع كده يتشهر قوي والموقع كمان بيقلك لو انت مش عارف تجيب 40 واحد اشتري من عندي شوية ناس وخد فلوسك تدخل عي صفحة الشراء وتختار ح تشتيري من مين وتيجي بقي للدفع الموقع بيقبل بيتكوين بس (ودي العملة اللي لا تقدر ترجع فيها فلوسك ولا حد يقدر يتتبع تحويلاتها) ولازم تدفع عشان تاخد فلوسك.

فانت لو قلبك جريئ واشتريت الدعوات احب اقلك كل سنة وانت طيب وراحت عليك فلوسك عشان الموقع بعد ما بيستلم فلوسك بيقفلك الاكونت بتاعك بحجة ان انت عملت ريجستر باسم مخالف او سجلت نفسك باسم من ضمن الناس اللي انت عملتهم دعوات او اي حجة تانية.

ولو حد حب يدور علي صحاب الموقع عشان يعرف مين صحابو ويحاول يوصلهم ح يدخل علي موقه whois عشان يعرف صحاب الدومين مين والمفاجئة التانية هنا ان صحاب الموقع شارين حماية ان المعلومات الشخصية او وسائل الاتصال يهم متكونش معروضة يعني فلوسك راحت وتعبك راح.

هل موقع  kabmoney.club  نصاب ولا لاء:-

بعد الشرح ده احب اقلكم ان موقع kabmoney.club نصاب بمنتهي الجدارة.

ونصيحة وانتوا بتشوفوا اي موقع شبيهة زي كده افتكروا جملة ( ان الحداية مش بتحدف كتاكيت).

0 التعليقات: